យុវជនវ័យក្មេង រួមចំណែកដល់ការប្រារព្ធសិទ្ធិនារី ៨ មីនា តាមរយៈការរំឮកឡើងវិញពីបទពិសោធន៍ជីដូនរបស់ខ្លួនឆ្លងកាត់របបខ្មែរក្រហម របាយការណ៍ដោយ៖ ថុន ស្រីពេជ្រ រូបថតដោយ៖ ភា រស្មី យុវតី២១នាក់ ក្នុងចំណោមក្មេងៗជំនាន់ក្រោយ៣៤នាក់ មកពីវិទ្យាល័យអង្គសរ ស្រុកមេសាង បានចំណាយពេលវេលាឈប់សម្រាកពីការរៀនសូត្ររបស់ខ្លួនក្នុងថ្ងៃទិវាសិទ្ធិនារីអន្តរជាតិ៨មីនា មកចូលរួមក្នុងកម្មវិធីវេទិកាថ្នាក់រៀនស្ថិតក្រោមការរៀបចំពីមជ្ឈមណ្ឌលឯកសារខេត្តព្រៃវែង នៅក្នុងការិយាល័យរបស់ខ្លួននៅក្នុងទីរួមខេត្តព្រៃវែង។ វេទិកានេះ ត្រូវបានរៀបចំឡើងមិនត្រឹមតែផ្តល់នូវចំណេះដឹងបន្ថែមពីប្រវត្តិសាស្ត្រកម្ពុជាប្រជាធិបតេយ្យ និងវិធីសាស្ត្រទប់ស្កាត់អំពើប្រល័យពូជសាសន៍ប៉ុណ្ណោះទេ ប៉ុន្តែថែមទាំងផ្តោតជាសំខាន់លើការពិភាក្សាពីប្រធានបទ «ទារុណកម្មស្ត្រីក្រោមរបបខ្មែរក្រហម» ដែលជាប្រធានបទឆ្លុះបញ្ចាំងពី៖ ១) ការរំលោភសិទ្ធិស្ត្រី និងការធ្វើទុកបុកម្នេញទៅលើស្ត្រីក្នុងរបបខ្មែរក្រហម, ២) ការរំឮក និងការផ្សារភ្ជាប់ទំនាក់ទំនងរវាងជីដូន និងចៅៗអំពីរឿងរ៉ាវលំបាកៗក្នុងរបបខ្មែរក្រហម, និង ៣) បណ្តុះនូវអារម្មណ៍អាណិតអាសូរពីសំណាក់យុវជនជំនាន់ក្រោយ ចំពោះជីដូនរបស់ខ្លួនដែលធ្លាប់ទទួលរងដោយផ្ទាល់ពីបទពិសោធន៍ជូរចត់ក្នុងអតីតកាល។ ជាការចាប់ផ្តើមវេទិកា លោក ផេង ពង្សរ៉ាស៊ី នាយកកម្មវិធីអប់រំពីអំពើប្រល័យពូជសាសន៍នៅកម្ពុជា នៃមជ្ឈមណ្ឌលឯកសារកម្ពុជា បានលើកយកជំពូកមួយនៃសៀវភៅប្រវត្តិសាស្ត្រកម្ពុជាប្រជាធិបតេយ្យ គឺជំពូកទី២៖ «តើខ្មែរក្រហមជានរណា? តើខ្មែរក្រហមឡើងកាន់អំណាចដោយរបៀបណា?» មកបកស្រាយប្រាប់ដល់យុវជនទាំងអស់ ក្នុងគោលបំណងបង្ហាញពីឫសគល់នៃការបំបិទសិទ្ធិសេរីភាពរបស់ស្ត្រី និងប្រជាជនទាំងអស់ក្នុងរបបខ្មែរក្រហម និងកាលៈទេសៈដែលនំាឲ្យកើតមានសង្គ្រាមនៅតាមមូលដ្ឋាន ការរងទុក្ខលំបាកដោយសារសង្គ្រាម ការបាត់បង់សិទ្ធិរស់នៅនិងសិទ្ធិប្រកបរបរចិញ្ចឹមជីវិត និងការកើតមានរបបខ្មែរក្រហមដែលមនុស្សជាតិទាំងអស់ពុំទទួលបានសិទ្ធិអ្វីទាំងអស់ រួមទាំងសិទ្ធរស់រានមានជីវិត សិទ្ធិដើរហើរ សិទ្ធិទទួលបានអាហារហូបចុកគ្រប់គ្រាន់ សិទ្ធិថែទាំសុខភាព សិទ្ធិគោរពជំនឿសាសនា សិទ្ធិទទួលបានការអប់រំ និងសិទ្ធិជ្រើសរើសគូស្រករ។ បន្ទាប់ពីការធ្វើបទបង្ហាញ និងសំណួរ-ចម្លើយរួចមក វេទិកាបានផ្តោតលើការពិភាក្សាពីរឿងរ៉ាវជីវិតឆ្លងកាត់របបខ្មែរក្រហម ដែលជាបទពិសោធន៍កើតមានផ្ទាល់លើគ្រួសាររបស់យុវជនម្នាក់ៗ ជាពិសេស រឿងរ៉ាវជីវិតរបស់ជីដូនៗ។ សំណួរណែនាំពីរត្រូវបានសួរទៅកាន់ក្រុមយុវជនគឺ៖ ១) តើខ្មែរក្រហមបានប្រើឲ្យលោកយាយរបស់ប្អូនធ្វើការងារអ្វីខ្លះ? និង ២) តើលោកយាយរបស់ប្អូនធ្លាប់ត្រូវខ្មែរក្រហមវាយធ្វើបាបដែរឬទេ? ប្រសិនជាធ្លាប់ តើការវាយធ្វើបាបនោះបណ្តាលមកពីអ្វី? សំណួរទាំងពីរនេះ រំលេចពីភាពជាអ្នកដឹកនាំរបស់ខ្មែរក្រហម ដែលមិនបានឲ្យតម្លៃចំពោះស្ត្រី និងការមិនអើពើដល់ទុក្ខលំបាករបស់ស្ត្រី។ ខាងក្រោមនេះ ជាការឆ្លើយតបរបស់យុវជនចំពោះសំណួរទាំងពីរ៖ បាន សុឃីម រៀននៅថ្នាក់ទី១២D៖ លោកយាយខ្ញុំត្រូវខ្មែរក្រហមប្រើឲ្យធ្វើការងារធ្ងន់ៗជាច្រើន ដូចជា៖ ជីកប្រឡាយ ជីកព្រែក រែកដី ធ្វើស្រែប្រាំង ដើររើសលាមកគោ និងលាមកមនុស្ស។ លោកយាយធ្លាប់ខ្មែរក្រហមធ្វើបាប ប៉ុន្តែមិនដល់ថ្នាក់វាយទេ គ្រាន់តែបង្អត់បាយលោកយាយ ធ្វើបាបលោកយាយឲ្យច្រូតស្រូវចំនួន១២ម៉ោង ព្រោះលោកយាយបានលួចគាស់ដំឡូងស្ងោរហូប។ វ៉ាន់ ចាន់រ៉ុង រៀននៅថ្នាក់ទី១២D៖ លោកយាយខ្ញុំប្រាប់ថា កាលនោះកម្មាភិបាលខ្មែរក្រហមប្រើឲ្យគាត់ធ្វើស្រែ ជីកស្រះ ជីកប្រឡាយ ធ្វើផ្លូវថ្នល់ លើប្រព័ន្ធភ្លឺស្រែ លើករបស់ធ្ងន់ៗ ធ្វើពលកម្មលើសកម្លាំង និងធ្វើការលើសពី១២ម៉ោងក្នុងមួយថ្ងៃ។ លោកយាយខ្ញុំហូបចុកមិនបានគ្រប់គ្រាន់ បណ្តាលឲ្យវិលមុខ ខ្យល់គ និងធ្វើឲ្យគាត់គ្មានកម្លាំងធ្វើការងារ។ ចយ ស្រីម៉ៅ រៀននៅថ្នាក់ទី១២C៖ លោកយាយខ្ញុំប្រាប់ខ្ញុំថា គាត់ធ្វើការងារដូចជា ច្រូតស្រូវ ជីកព្រែក ជីកប្រឡាយ រើសលាមកគោ រែកដី មើលក្មេងៗ និងបុកស្រូវ។ ខ្មែរក្រហមធ្លាប់ធ្វើបាបលោកយាយព្រោះលោកយាយបានធ្វើខុសគោលការណ៍របស់អង្គការ។ គាត់បានលួចរបស់របរសម្រាប់បរិភោគ ដូចជាដំឡូង ពោត មាន់ និងលួចដាំបាយហូប។ ហៀម ស្រីលីស រៀននៅថ្នាក់ទី១២D៖ លោកយាយធ្វើការងារធ្ងន់ដូចជា ជីកព្រែក ជីកស្រះ ទប់ភ្លឺស្រែ រែកដីធ្វើផ្លូវថ្នល់ និងប្រើឲ្យធ្វើការងារគ្មានពេលសម្រាកដោយមិនកំណត់ម៉ោងការងារ ឡើយ។ ខ្មែរក្រហមហៅឲ្យទៅពេលណាគាត់ទៅពេលនោះ។ ខ្មែរក្រហមបានបង្ខំឲ្យលោកយាយខ្ញុំធ្វើការ ទាំងលោកយាយកពុងពពោះអ៊ំប្រុស។ ពេលសម្រាលកូនហើយ លោកយាយក៏នៅតែលំបាក។ អង្គការចោទថាលោកយាយខ្ជិលច្រអូស ប៉ុន្តែលោកយាយពិតជាឈឺ វិលមុខ អស់កម្លាំងមែន។ ខែម ស្រីពៅ រៀននៅថ្នាក់ទី១២C៖ លោកយាយខ្ញុំធ្វើស្រែ ជីកប្រឡាយ រែកដី បុកស្រូវ កាប់កូនឈើ មើលក្មេងតូចៗ និងដើររើសលាមកគោធ្វើជី។ លោកយាយត្រូវបានអង្គការបង្អត់អាហារ ព្រោះលោកយាយលួចគាស់ដំឡូងហូបម្នាក់ឯង លួចធ្វើមាន់ហូបទៀត។ លោកយាយបានបន្ថែមថា ដោយសារតែទទួលបានរបបអាហារតិចតួច ហើយគ្មានកម្លាំងក្នុងការធ្វើការងារទើបយាយដាច់ចិត្តលួចហូប។ រឿន សុនីតា រៀននៅថ្នាក់ទី១២B៖ ចំពោះការងារធ្ងន់ៗ លោកយាយខ្ញុំបានធ្វើដូចជា ជីកប្រឡាយ ជីកស្រះ ជីកព្រែក ទប់ភ្លឺស្រែ ដកស្ទូង ធ្វើផ្លូវថ្នល់ និងកាងារជាច្រើនទៀតដែលអង្គការប្រើ។ លោកយាយឈឺ អស់កម្លាំង ធ្វើការមិនរួច អង្គការបានចោទយាយថា ជាមនុស្សខ្ជិលច្រអូស គេចវេសពីការងារ។