របាយការណ៍ដោយ៖ ជីម សុខគា រូបថតដោយ៖ ផេង ពង្សរ៉ាស៊ី និង ង៉ាន់ វីន មជ្ឃមណ្ឌលឯកសាខេត្តតាកែវ បានរៀបចំធ្វើវេទកាថ្នាក់រៀននៅថ្ងៃពុធ ទី១៨ ខែមករា ឆ្នាំ ២០២៣ ជាមួយក្រុមយុវជនមកពីវិទ្យាល័យ ហ៊ុនសែន កោះអណ្តែត ចំនួន៣៥នាក់ ក្នុងនោះមានសិស្សស្រីចំនួន១៩នាក់ ក្រោមការមើលខុសត្រូវពីគ្រូបង្រៀនមុខវិទ្យាប្រវត្តិវិទ្យាចំនួន២នាក់។ វេទិកាថ្នាក់រៀននេះ បានជម្រុញលើកទឹកចិត្តដល់យុវជន និងក្មេងៗជំនាន់ក្រោយ ឲ្យខិតខំរៀនសូត្រ និងចងចាំពីប្រវត្តិសាស្ត្រនេះ ក៏ដូចជាឲ្យអ្នកទាំងនោះចេះរួបរួមសហការគ្នា ដើម្បីលុបបំបាត់នូវរបបខ្មែរក្រហមកុំឲ្យមានការកើតឡើងវិញ។ នៅវេលាម៉ោង៨កន្លះព្រឹក ក្រុមយុវជនបានមកដល់មជ្ឈមណ្ឌលឯកសារខេត្តតាកែវ និងបានទស្សនាពិព័រណ៍រូបថតដែលស្ថិតនៅខាងមុខ និងខាងក្នុងការិយាល័យ។ ក្រុមយុវជនទាំងនោះ ក៏ត្រូវបានណែនាំឲ្យដឹងពីការដាក់តម្កល់ឯកសារខ្មែរក្រហមនៅក្នុងទូរដែកដែលស្ថិតនៅខាងក្នុងការិយាល័យផងដែរ។ ក្នុងពេលទស្សនៈកិច្ចពិព័រណ៍ យុវជនមួយចំនួនបានសួរសំណួរទាក់ទងនឹងផ្ទាំងរូបថត និងឯកសារ។ នៅក្នុងបន្ទប់ថ្នាក់រៀន យុវជនទាំងអស់តម្រូវឲ្យបំពេញកម្រងសំណួរវាស់ស្ទង់ចំណេះដឹង មុនពេលដែលអ្នកទាំងនោះទទួលបានចំណេះដឹងពីការធ្វើវេទិកា។ គ្រូឧទ្ទេស ផេង ពង្សរ៉ាំស៊ី ចាប់ផ្ដើមធ្វើបទបង្ហាញ បន្ទាប់ពីយុវជនបានបញ្ចប់ការវាស់ស្ទង់ចំណេះដឹងរួច។ ដោយមានសំណូមពរពីគ្រូបង្រៀនមុខវិជ្ជាប្រវត្តិវិទ្យា ស្នើសុំឲ្យគ្រូឧទ្ទេសធ្វើបទបង្ហាញពីការកកើត និងមូលហេតុនៃការលេចចេញរបបខ្មែរក្រហម គ្រូឧទ្ទេសបានធ្វើបទបង្ហាញពីប្រធានបទនេះតាមសំណូមពរ។ បន្ទាប់បញ្ចប់ការធ្វើបទបង្ហាញលើមាតិកាប្រវត្តិសាស្ត្រ គ្រូឧទ្ទេសបានបន្តការធ្វើបទបង្ហាញពីនិយមន័យនៃអំពើប្រល័យពូជសាសន៍ និងវិធីសាស្ត្រជាក់លាក់ក្នុងការទប់ស្កាត់អំពើហិង្សាក្នុងកម្រិតបុគ្គល គ្រួសារ សហគមន៍ និងប្រទេសជាតិ។ បន្ទាប់ពីរយៈពេលប្រមាណ២ម៉ោងនៃការធ្វើបទបង្ហាញរបស់គ្រូឧទ្ទេស ក្រុមយុវជនគឺតម្រូវឲ្យបំពេញកម្រងសំណួរវាស់ស្ទង់ចំណេះដឹងម្តងទៀត ដើម្បីចង់ដឹងថាតើចំណេះដឹងរបស់អ្នកទាំងនោះកើនឡើងឬយ៉ាងណា។ បន្ទាប់មក ក្រុមការងារ លោកគ្រូអ្នកគ្រូដឹកនាំ និងក្រុមយុវជនទាំងអស់ បានថតរូបជុំគ្នាទុកជាអនុស្សាវរីយ៍។ នៅរសៀលម៉ោង២ យុវជនទាំងអស់បានធ្វើដំណើរទៅកាន់ទីតាំងមួយដែលជាអតីតមន្ទីរសន្តិសុខក្រាំងតាចាន់ ដើម្បីស្តាប់ការចែករំលែករឿងរ៉ាវបទពិសោធន៍របស់អ្នករស់រានមានជីវិតម្នាក់ ដែលបានស្ម័គ្រចិត្តមកនិយាយប្រាប់ពីប្រវត្តិរបស់គាត់។ លោកតាម្នាក់មានឈ្មោះ សេង ហេង សព្វថ្ងៃគាត់មានអាយុ៧៥ឆ្នាំ បានរៀបរាប់ទូទៅទាក់ទងទៅនឹងទីតាំងប្រល័យពូជសាសន៍នៅមណ្ឌលឧក្រិដ្ឋកម្មក្រាំងតាចាន់ នៅក្នុងរបបខ្មែរក្រហមរយៈពេល ៣ឆ្នាំ ៨ខែ ២០ថ្ងៃ ជាកន្លែងដែលអង្អត់អាហារ ធ្វើទារុណកម្ម សួរចម្លើយ និងសម្លាប់។ បន្ទាប់ពីរៀបរាប់រួច លោកតា បានបង្ហាញដល់ក្រុមយុវជនទាំងអស់ពីការបណ្តើរអ្នកទោសចូលមន្ទីរ កន្លែងដាក់ឃុំឃាំង កន្លែងសួរចម្លើយ កន្លែងសម្លាប់ និងចុងក្រោយគាត់បាននាំយុវជនទាំងនោះទៅកាន់មន្ទីរបូជនីយដ្ឋានតម្កល់អដ្ឋិធាតុដែលមានតម្កល់ឆ្អឹងស្មងដៃជើង និងឆ្អឹងលលាដ៏ក្បាលសាកសពយ៉ាងច្រើន។ នៅក្រាំងតាចាន់ គ្រូឧទ្ទេសក៏បានបង្ហាញដល់ក្រុមយុវជនពីការបង្កើតមន្ទីរសន្តិសុខរបស់ខ្មែរក្រហម ហើយមន្ទីរសន្តិសុខក្រាំងតាចាន់គឺជាមន្ទីរសន្តិសុខថ្នាក់ស្រុកមួយ ក្នុងចំណោមមន្ទីរសន្តិសុខទាំង១៩៧ដែលខ្មែរក្រហមបានបង្កើតឡើង។ លើសពីនេះទៀត គ្រូឧទ្ទេសក៏បានលើកឡើងពីការចងក្រងរបាយការណ៍លម្អិតទាក់ទងនឹងមន្ទីរសន្តិសុខក្រាំងតាចាន់ ប្រាប់ដល់ក្រុមយុវជនទាំងអស់ឲ្យបានដឹង មុននឹងអ្នកទាំងនោះដើរមើលទីតាំងនានាជុំវិញមន្ទីរសន្តិសុខ។