ព្រឹកថ្ងៃទី២៦ ខែកុម្ភៈ ឆ្នាំ២០២៤ ក្រុមការងារមជ្ឈមណ្ឌលឯកសារកោះថ្ម នៃមជ្ឈមណ្ឌលឯកសារកម្ពុជា បានចុះជួបជាមួយអ្នករស់រានមានជីវិតពីរបបខ្មែរក្រហមស្តីពី«ប្រវត្តិសាស្ត្រផ្ទាល់មាត់» ចំំនួន៤គ្រួសារ នៅភូមិឈូក ឃុំត្រមូង ស្រុកមេមត់ ខេត្តត្បូងឃ្មុំ។ ក្រុមការងារមាន៖ វី ស៊ីថា ម៉ាប់ ស៊ីណា, វន បុប្ផា, និង ឈុំ រ៉ា ស្ថិតិចុងឆ្នាំ២០២៣ ភូមិឈូកមានប្រជាជនសរុបចំនួន ៧៥៩នាក់ ស្រី៣៩៧នាក់ មានអាយុ១៨ឆ្នាំឡើងមាន ៥៤៦នាក់ ស្រី២៩៧នាក់ ចំនួនគ្រួសារ ១៩១គ្រួសារ។ ភូមិឈូកជាមួយក្នុងចំណោម១៩ភូមិផ្សេងទៀត ក្នុងឃុំត្រមូង ស្រុកមេមត់ ខេត្តត្បូងឃ្មុំ។ មានព្រំប្រទល់ខាងលិចជាប់ភូមិងើធំ ខាងកើតជាប់ភូមិអណ្តូងថ្មក្រោម ខាងជើងជាប់ភូមិជ្រៃ និងខាងត្បូងជាប់ភូមិជាំត្រាវ។ មុនសម័យបារាំងមានមានត្រពាំងមួយដ៏ធំ ហើយមានដើមឈូកដុះពេញផ្ទៃត្រពាំង។ ឈូកចាប់ផ្តើមចេញផ្កាស្កុះស្គាយ អមជាមួយស្លឹកពណ៌បៃតងខ្ចី និងមានទឹកសម្រាប់ផ្គត់ផ្គង់បានគ្រប់គ្រាន់នូវតម្រូវការ។ មានព្រះសង្ឃចំនួនពីរអង្គបាននិមន្តមកពីឆ្ងាយឈប់សម្រាក ចុះស្រង់ទឹកក្នុងត្រពាំងឈូក។ ក្រោយពីស្រង់ទឹករួចក៏គង់សម្រាកមួយសន្ទុះស្រាប់តែចាប់ចិត្តទីតាំងដ៏ល្អនិងមានកន្លែងសម្រាប់សាងសង់វត្តអារាម។ បន្ទាប់មកព្រះសង្ឃទាំងពីរអង្គបានកសាងវត្តធ្វើវិហាមួយតូចក្រប់ក្បឿង ហើយដាក់ឈ្មោះថា«វត្តត្រពាំងឈូក»។ ក្រោយពីបានធ្វើវិហាររួចរាល់ព្រះសង្ឃទាំងពីរអង្គនិមន្តទៅបាត់អស់លែងមានអ្នកមកថែទាំវត្ត។ ក្រោយពេលបោះបង់វត្តចោលដើមឈើទាលបានដុះចំវិហារ ពីមួយថ្ងៃទៅមួយថ្ងៃដើមឈើទាលកាន់តែធំ រហូតដុះចាក់ដំបូលវិហារធ្លាក់ក្បឿងដល់ដី។ ចាប់តាំងពីពេលនោះមកវិហារមានសភាពទ្រុតទ្រោមខ្លាំង រហូតមានការបាក់បែកខូចអស់។ ចំណែកដើមឈើទាលកាន់តែធំឡើងតាមធម្មជាតិ។ រហូតមកសព្វថ្ងៃនេះដើមឈើទាលមានទំហំធំ មនុស្សចំនួន៧នាក់ទើបឱបជុំ។ ដោយ ឈុំ រ៉ា