Text by Sopheak Pheana Photo by Chhum Ra March 12, 2023 Documentation Center of Cambodia Archives

ថ្នាក់រៀននៅក្នុងថ្ងៃនេះ ផ្តោតទៅលើទំនាក់ទំនងការបរទេសនៃរបបកម្ពុជាប្រជាធិបតេយ្យ និងកត្តាដែលចូលរួមចំណែកនៅក្នុងភាពបរាជ័យនៃរបបនេះ។ សិស្សានុសិស្សថ្នាក់ទី១២ ចំនួន៦០រូប មកពីវិទ្យាល័យអូររាំងឪ បានចូលរួមនៅក្នុងថ្នាក់រៀននាថ្ងៃនេះ។ ការពន្យល់រៀបរាប់អំពីពិព័រណ៍រូបថតប្រវត្តិសាស្ត្រ នៅមុនពេលចាប់ផ្តើមថ្នាក់រៀន សិស្សានុសិស្សបានស្តាប់ការពន្យល់បកស្រាយដោយលោក ឡុង ដានី នាយកមជ្ឈមណ្ឌលកោះថ្ម អំពីពិព័រណ៍រូបថតដែលដាក់តាំងបង្ហាញនៅក្នុងថ្នាក់។ ពិព័រណ៍ដែលតាំងបង្ហាញផ្តល់នូវព័ត៌មានប្រវត្តិសាស្ត្រចាប់តាំងពីទសវត្សរ៍ឆ្នាំ១៩៧០ ដល់ទសវត្សរ៍ឆ្នាំ១៩៨០ ដោយផ្តោតជាពិសេសលើប្រវត្តិសាស្ត្រនៃរបបកម្ពុជាប្រជាធិបតេយ្យ។ ពិព័រណ៍ក៏បានរំលេចអំពីព្រឹត្តិការណ៍ប្រវត្តិសាស្ត្រដ៏សំខាន់ពាក់ព័ន្ធទៅនឹងការដួលរលំនៃរបបខ្មែរក្រហមថែមទៀតផង។ ថ្នាក់រៀន និងកិច្ចពិភាក្សា បន្ទាប់ពីការបកស្រាយអំពីពិព័រណ៍បានបញ្ចប់ទៅ គ្រូឧទ្ទេសឈ្មោះ សុភ័ក្ត្រ ភាណា បានធ្វើបទបង្ហាញអំពីការវិភាគលម្អិតអំពីនយោបាយការបរទេសនៃរបបកម្ពុជាប្រជាធិបតេយ្យ។ បទបង្ហាញរំលេចអំពីផ្នត់គំនិតនៃទំនាក់ទំនងការបរទេសនៃរបបកម្ពុជាប្រជាធិបតេយ្យ ដោយផ្តោតទៅលើការសម្រេចចិត្តសំខាន់ៗធ្វើឡើងនៅក្នុងរបបនេះ និងផលវិបាកនៃសេចក្តីសម្រេចទាំងនោះ។ ការរំឭកមេរៀនឡើងវិញនិងកិច្ចពិភាក្សា ដើម្បីសង្ខេបការយល់ឃើញរួមគ្នាក្នុងចំណោមសិស្សានុសិស្សបន្ទាប់ពីថ្នាក់រៀនបញ្ចប់ទៅ គ្រូបង្គោលបានធ្វើការសរុបសេចក្តី ដោយចោទជាសំណួរលើចំណុចសំខាន់ៗនៃ មេរៀនក្នុងថ្ងៃនេះ។ សំណួរទាំងនោះរួមមាន ដូចជា ផលប៉ះពាល់នៃគោលនយោបាយការបរទេសនៃរបបកម្ពុជាប្រជាធិបតេយ្យចំពោះប្រទេសជិតខាង និងមតិយល់ឃើញរបស់សិស្សថាតើ គួរមានយុទ្ធសាស្ត្រការបរទេសណាមួយដែលកម្ពុជាប្រជាធិបតេយ្យគួរអនុវត្ត ជាជាងគោលនយោបាយការបរទេសជាក់ស្តែងដែលរបបនេះបានអនុវត្ត ជាដើម។ សរុបសេចក្តីមក ថ្នាក់រៀននៅក្នុងថ្ងៃនេះ ផ្តល់ជាការត្រិះរិះពិចារណាចាំបាច់ទៅលើគោលនយោបាយការបរទេស ដែលមានឥទ្ធិពលយ៉ាងខ្លាំងទៅលើបែបផែននៃរបបខ្មែរក្រហម។ ការរួមផ្សំគ្នារវាងពិព័រណ៍រូបថត និងការពិភាក្សាគ្នាយ៉ាងសកម្ម បានផ្តល់នូវការយល់ដឹងស៊ីជម្រៅអំពីអំឡុងកាលប្រវត្តិសាស្ត្រដ៏ចាំបាច់របស់កម្ពុជា។